ಬೆಂಗಳೂರು: ರಾಷ್ಟ್ರೀಯ ಹೆದ್ದಾರಿಗಳಲ್ಲಿನ ಟೋಲ್ ಕೇಂದ್ರಗಳಲ್ಲಿ ಫಾಸ್ಟ್ಯಾಗ್ ಬಳಸುವಾಗ ವಾಹನ ಚಾಲಕರು ಅನುಸರಿಸಬೇಕಾದ ಕೆಲವು ನಿಯಮಗಳು ಫೆಬ್ರುವರಿ 17ರಿಂದ ಜಾರಿಗೆ ಬರುವಂತೆ ಬದಲಾಗಿವೆ. ರಾಷ್ಟ್ರೀಯ ಪಾವತಿ ನಿಗಮವು ಬಿಡುಗಡೆ ಮಾಡಿರುವ ಹೇಳಿಕೆಯಲ್ಲಿ ವಿವರಿಸಿರುವ ಬದಲಾವಣೆಗಳು ಹೀಗಿವೆ.
ನಿಮ್ಮ ವಾಹನ ಟೋಲ್ ಕೇಂದ್ರವನ್ನು ತಲುಪುವುದಕ್ಕಿಂತ ಒಂದು ತಾಸು ಮೊದಲು ಫಾಸ್ಟ್ಯಾಗ್ ಅನ್ನು ಕಪ್ಪುಪಟ್ಟಿಗೆ ಸೇರಿಸಲಾಗಿದ್ದರೆ, ಅದರಲ್ಲಿ ಅಗತ್ಯ ಪ್ರಮಾಣದಲ್ಲಿ ಹಣವಿಲ್ಲದಿದ್ದರೆ ಹಾಗೂ ಟೋಲ್ ಕೇಂದ್ರ ತಲುಪಿದ ಹತ್ತು ನಿಮಿಷಗಳ ನಂತರವೂ ಆ ಟ್ಯಾಗ್ ಸಕ್ರಿಯಗೊಂಡಿಲ್ಲದೆ ಇದ್ದರೆ ವಹಿವಾಟು ತಿರಸ್ಕೃತಗೊಳ್ಳಲಿದೆ ಎಂದು ನಿಗಮ ಹೇಳಿದೆ.
ಅಂದರೆ, ವಾಹನ ಚಾಲಕರು, ಮಾಲೀಕರು ಟೋಲ್ ಕೇಂದ್ರ ತಲುಪುವ ಒಂದು ತಾಸಿನ ಮೊದಲೇ ಅಗತ್ಯ ಪ್ರಮಾಣದಲ್ಲಿ ಹಣವನ್ನು ಟ್ಯಾಗ್‌ನ ವಾಲೆಟ್‌ಗೆ ಭರ್ತಿ ಮಾಡಿರಬೇಕು. ಅದು ಒಂದು ವೇಳೆ ಸಾಧ್ಯವಾಗದೆ ಇದ್ದಲ್ಲಿ, ಟೋಲ್ ಕೇಂದ್ರ ಪ್ರವೇಶಿಸಿದ ಹತ್ತು ನಿಮಿಷಗಳ ಒಳಗೆ ಫಾಸ್ಟಾಗ್ ವಾಲೆಟ್‌ಗೆ ಹಣ ಹಾಕಿರಬೇಕು. ವಾಹನ ಚಾಲಕರು ಅಥವಾ ಮಾಲೀಕರು ಇವೆರಡನ್ನು ಮಾಡದಿದ್ದರೆ ಫಾಸ್ಟ್ಯಾಗ್ ಮೂಲಕವೇ ದಂಡ ಸೇರಿ ಎರಡು ಪಟ್ಟು ಹಣ ಕಟ್ಟಬೇಕಾಗುತ್ತದೆ ಎಂದು ನಿಗಮ ಹೇಳಿದೆ.