ಮಧ್ಯಪ್ರದೇಶ ( ಇಂದೋರ್): ಆಕ್ಷೇಪಣೆಯ ಹೊರತಾಗಿಯೂ ಪತಿ ಅಥವಾ ಪತ್ನಿ ಬೇರೆಯವರ ಜೊತೆ ಮೊಬೈಲ್ ನಲ್ಲಿ ಅಶ್ಲೀಲ ಚಾಟಿಂಗ್ ಮೂಲಕ ಮಾತನಾಡುವ ಚಟುವಟಿಕೆಗಳನ್ನು ಮುಂದುವರೆಸಿದರೆ ಅದು ಖಂಡಿತವಾಗಿಯೂ ಮಾನಸಿಕ ಕ್ರೌರ್ಯಕ್ಕೆ ಕಾರಣವಾಗುತ್ತದೆ’ ಎಂದು ಮಧ್ಯಪ್ರದೇಶ ಹೈಕೋರ್ಟ್ ಹೇಳಿದೆ.
ತನ್ನ ವಿವಾಹ ರದ್ದತಿಯನ್ನು ಪ್ರಶ್ನಿಸಿ ಮಹಿಳೆಯೊಬ್ಬರು ಸಲ್ಲಿಸಿದ್ದ ಮೇಲ್ಮನವಿಯನ್ನು ಮಧ್ಯಪ್ರದೇಶ ಹೈಕೋರ್ಟ್ ವಜಾಗೊಳಿಸಿದ್ದು, ಮಾತ್ರವಲ್ಲದೇ ಇತರ ಪುರುಷರೊಂದಿಗಿನ ಆಕೆಯ ಅಶ್ಲೀಲ ಸಂಭಾಷಣೆಗಳು ತನ್ನ ಗಂಡನ ವಿರುದ್ಧದ ಮಾನಸಿಕ ಕ್ರೌರ್ಯವಾಗಿದೆ ಎಂದು ಅಭಿಪ್ರಾಯಪಟ್ಟಿದೆ.
ಹೈಕೋರ್ಟ್ ಇಂದೋರ್ ಪೀಠದಲ್ಲಿ ನ್ಯಾಯಮೂರ್ತಿ ವಿವೇಕ್ ರುಸಿಯಾ ಮತ್ತು ನ್ಯಾಯಮೂರ್ತಿ ಗಜೇಂದ್ರ ಸಿಂಗ್‌ ಈ ಪ್ರಕರಣದ ವಿಚಾರಣೆ ನಡೆಸಿ, ‘ಯಾವುದೇ ಪತಿ ತನ್ನ ಹೆಂಡತಿ ಬೇರೆಯವರೊಂದಿಗೆ ಮೊಬೈಲ್‌ನಲ್ಲಿ ಅಶ್ಲೀಲ ಚಾಟಿಂಗ್ ಮೂಲಕ ಮಾತನಾಡುವುದನ್ನು ಸಹಿಸುವುದಿಲ್ಲ. ಮದುವೆಯ ನಂತರ ಪತಿ ಮತ್ತು ಪತ್ನಿ ಇಬ್ಬರೂ ಸ್ನೇಹಿತರೊಂದಿಗೆ ಮೊಬೈಲ್, ಚಾಟಿಂಗ್ ಮತ್ತು ಇತರ ವಿಧಾನಗಳ ಮೂಲಕ ಸಂಭಾಷಣೆ ನಡೆಸುವ ಸ್ವಾತಂತ್ರ್ಯವನ್ನು ಹೊಂದಿರುತ್ತಾರೆ. ಆದರೆ ಸಂಭಾಷಣೆಯ ಮಟ್ಟವು ಸಭ್ಯತೆಯಿಂದ ಕೂಡಿರಬೇಕು ವಿಶೇಷವಾಗಿ ವಿರುದ್ಧ ಲಿಂಗದೊಂದಿಗೆ ಮಾತನಾಡುವಾಗ. ಇದು ಜೀವನ ಸಂಗಾತಿಗೆ ಆಕ್ಷೇಪಾರ್ಹವಲ್ಲದಿರಬಹುದು. ಆಕ್ಷೇಪಣೆಯ ಹೊರತಾಗಿಯೂ ಪತಿ ಅಥವಾ ಪತ್ನಿ ಅಂತಹ ಚಟುವಟಿಕೆಗಳನ್ನು ಮುಂದುವರಿಸಿದರೆ, ಅದು ಖಂಡಿತವಾಗಿಯೂ ಮಾನಸಿಕ ಕ್ರೌರ್ಯಕ್ಕೆ ಕಾರಣವಾಗುತ್ತದೆ’ ಎಂದು ಹೇಳಿದೆ.
ಈ ದಂಪತಿ ಡಿಸೆಂಬರ್ 2018 ರಲ್ಲಿ ಹಿಂದೂ ಪದ್ಧತಿಗಳ ಪ್ರಕಾರ ವಿವಾಹವಾಗಿದ್ದರು. ಭಾಗಶಃ ಶ್ರವಣದೋಷವಿರುವ ಬ್ಯಾಂಕ್‌ ಮ್ಯಾನೇಜ‌ರ್ ಆಗಿರುವ ಪತಿ ತನ್ನ ಪತ್ನಿ ತನ್ನ ತಾಯಿಯೊಂದಿಗೆ ಕೆಟ್ಟದಾಗಿ ವರ್ತಿಸುತ್ತಿದ್ದರು, ಮತ್ತು ನನ್ನ ತಾಯಿಯನ್ನು ‘ಕಿವುಡರ ತಾಯಿ’ ಎಂದು ಸಂಬೋಧಿಸುತ್ತಿದ್ದರು ಎಂದು ಆರೋಪಿಸಿದರು. ಪತ್ನಿ ಒಂದುವರೆ ತಿಂಗಳಲ್ಲಿ ಗಂಡನ ಮನೆಯನ್ನು ತೊರೆದು ಪುನಃ ಹಿಂತಿರುಗಲು ನಿರಾಕರಿಸಿದರು ಎಂದು ಸಹ ಆರೋಪಿಸಲಾಗಿದೆ.
ತನ್ನ ಪತ್ನಿ ತನ್ನ ಹಿಂದಿನ ಪ್ರೇಮಿಯೊಂದಿಗೆ ವಾಟ್ಸಾಪ್‌ನಲ್ಲಿ ಸ್ಪಷ್ಟ ಸಂಭಾಷಣೆ ನಡೆಸುತ್ತಿದ್ದಾಳೆ, ಹಿಂದಿನ ದೈಹಿಕ ಸಂಬಂಧಗಳ ಬಗ್ಗೆ ಚರ್ಚಿಸುತ್ತಿದ್ದಾಳೆ ಎಂದು ಪತಿ ಆರೋಪಿಸಿದ್ದಾರೆ.ತನ್ನನ್ನು ಸುಳ್ಳು ಪ್ರಕರಣಗಳಲ್ಲಿ ಸಿಲುಕಿಸುವುದಾಗಿ ಆಕೆ ಬೆದರಿಕೆ ಹಾಕಿದ್ದಾಳೆ ಎಂದು ಅವರು ಆರೋಪಿಸಿದ್ದಾರೆ. ತನ್ನ ಆರೋಪಗಳಿಗೆ ಬೆಂಬಲವಾಗಿ, ಪತಿ ವಾಟ್ಸಾಪ್ ಚಾಟ್ ಪ್ರತಿಗಳು, ಪೊಲೀಸ್ ದೂರು ಮತ್ತು ತನ್ನ ಮಗಳ ನಡವಳಿಕೆ ಕುಟುಂಬಕ್ಕೆ ಅವಮಾನ ತಂದಿದೆ ಎಂದು ಪತ್ನಿಯ ತಂದೆ ಬರೆದಿರುವ ಲಿಖಿತ ಹೇಳಿಕೆಯನ್ನು ನ್ಯಾಯಾಲಯಕ್ಕೆ ಪ್ರಸ್ತುತಪಡಿಸಿದ್ದಾರೆ.
ಸಾಕ್ಷ್ಯಗಳನ್ನು ಮೌಲ್ಯಮಾಪನ ಮಾಡಿದ ನಂತರ, ಕುಟುಂಬ ನ್ಯಾಯಾಲಯವು ಪತಿಯ ಪರವಾಗಿ ತೀರ್ಪು ನೀಡಿ, ಜೂನ್ 24, 2023 ರಂದು ಮಾನಸಿಕ ಕ್ರೌರ್ಯದ ಆಧಾರದ ಮೇಲೆ ವಿಚ್ಛೇದನವನ್ನು ನೀಡಿ ಆದೇಶಿಸಿದೆ.